Usted está aquí

Os ollos da ponte. Unha foto no blog "Los tesoros del mochilero pirata" e un poema de Ramiro Fonte

JoseFS

Apareceu estes días un novo blog que moito nos marabillou aos que amamos a Pontedeume, Los tesoros del mochilero pirata https://lostesorosdelmochileropirata.wordpress.com/2015/09/06/el-abordaje-de-un-pirata/. Ángel Cendón, vilancho da praza das Angustias de sangue e sentimento, e tamén asturiano de corazón, vai, como aqueles piratas da novela de Stevenson, na procura das prezada alfaias que Pontedeume posúe e sempre consegue captar cunha arma de paz, a súa cámara, alfaias agochadas que ás veces temos diante e os nosos ollos non ven.

Esta do arco da nosa ponte de pedra fermosamente acesa, baixando da Festa do Río, unha das que máis me gustou, rescatou dun recuncho privilexiado da miña memoria un breve pero intenso poema do noso bardo Ramiro Fonte, que naceu e pasou os anos da súa infancia tamén nunha casa daquela feiticeira praciña.

Baixo os arcos desta ponte,

pasan as augas da vida

durmidas.

 

Pasan as augas do tempo

levando os ollos dun neno

cara ás outras augas frías.

 

Ramiro Fonte: "Ponte", en Luz do mediodía, A Coruña, 1995.

 

 

Añadir nuevo comentario