Imaxe do Salvador na capela de San Miguel de Breamo

Ao meu amigo Salvador Tenreiro Díaz,

que ama Breamo coma min

A imaxe do Salvador que se atopa no presbiterio da ermida de San Miguel de Breamo foi traída aí, consonte nos conta o meu amigo Xesús Andrés López Calvo, da capela do Espírito Santo, situada a carón do hospital de peregrinos que había na ponte eumesa mandada construír por Fernán Pérez de Andrade o Bo (Xesús Andrés López Calvo: "Los hospitales para peregrinos del Camino Inglés a Santiago", en Estudios Mindonienses, 20, Ferrol, 2004, p. 758) (Debuxos de M. Marín e Fernando Sarmiento).

Como acontece no Pórtico da Gloria do Mestre Mateo, era frecuente poñer a imaxe do Salvador, sedente no trono celeste e mostrando as feridas dos cravos nos pés e nas mans e a do costado, inflixida pola lanza de Lonxinos, nas metas de peregrinación, para simbolizar que despois do duro traballo do camiño, como metáfora da vida, está o premio de alcanzar a meta, que para os romeiros é a chegada á capela para gozar da festa e visitar o santo e para os cristiáns é o Ceo por mor do martirio redentor de Xesús Cristo na cruz.