Usted está aquí

A escaleira que sobe Ramiro Fonte na procura da infancia

JoseFS

Non quería a cidade, pero ben que lembraba

os vellos veráns, os descampados

sen nome

dun barrio alto

coas sabas ó clareo, estendidas na herba;

e aqueles rengueantes tranvías

a gabear nas costas, que subían

ós montes periféricos

moita luz da ribeira,

chea de sal e fortuna,

e baixaban os homes con camisas

brancas, arelantes de mar.

[...]

(Lenzo de Abelardo Miguel)

Era unha luz distinta

a aquela que esvaraba pola aba do monte

da miña vila, sempre

invernal, case sempre

durmida no avesío das esperas.

Era luz de veleiros, de illas, de distancias,

luz de luces marítimas: baixaba

polos cendais do ceo,

e os ollos reclamaban tanta luz, e perderse

na sorpresa das rúas

portuarias, felices,

nos acenos anónimos daqueles habitantes.

[...]

(Lenzo de Abelardo Miguel)

Tódolos días paso

diante dunha escaleira

que sobe á miña infancia,

tódolos días, luns e martes, mércores,

e case nunca a miro, porque sei

que vai a aquela rúa,

e case nunca a miro por se baixa

outro neno por ela.

(Debuxo de José Ramón)

Ramiro Fonte: "Algúns motivos", en Luz do mediodía, A Coruña, 1995, p. 113-115.

Añadir nuevo comentario